ग्वालियर : निवडणूक लढवण्याचं अनेकांचं स्वप्न असतं, पण ग्वाल्हेरच्या एका चहा विक्रेत्याला निवडणूक लढवण्याची इतकी आवड, की त्यांनी आतापर्यंत २७ वेळा निवडणूक लढवली आहे. २७ वेळा निवडणूक लढवली असूनही, आजपर्यंत त्यांचा एकाही निवडणुकीत विजय झालेला नाही.आतापर्यंत त्यांनी नगरसेवक ते राष्ट्रपतीपदापर्यंतची निवडणूक लढवली आहे. इतकंच नाही, तर जेव्हा कधी एखाद्या पदासाठी महिलांची जागा असते, तेव्हा ते त्या जागेसाठी पत्नीला सहभागी करुन घेतात. ग्वाल्हेरचे हे आनंद कुशवाह असं का करतात?
राज्यात लोकसभा निवडणुका होणार आहेत. यासाठी आघाडीच्या पक्षांसह अपक्ष उमेदवारही अर्ज भरत आहेत. यात ग्वाल्हेरमध्ये चहाचं दुकान चालवणारे सर्वसामान्य आनंद कुशवाह यांनीही उमेदवारी दाखल केली आहे.
ग्वाल्हेरचे आनंद कुशवाह आठवी पास आहेत. त्यांची निवडणूक लढवण्याची जिद्द अशी आहे, की जिंकणं किंवा हरणं याचा त्यांना फरक पडत नाही. त्यांच्या मनात एकच गोष्ट आहे की त्यांना निवडणूक लढवायची आहे. समधिया कॉलनीत राहणारे आनंद कुशवाह हे चहाचं दुकान चालवतात आणि जेव्हा निवडणूका येतात तेव्हा ते प्रचाराला सुरुवात करतात.
या लोकसभा निवडणुकीबाबत बोलताना त्यांनी सांगितलं, की निवडणूक जिंकू किंवा हरु पण निवडणूक लढवणार हे नक्की. जेव्हा आनंद कुशवाह निवडणूक लढवण्यासाठी उमेदवारी अर्ज भरण्यासाठी सायकलवरुन बाहेर पडतात तेव्हा त्यांचा हा अंदाज पाहून अनेकजण हैराण होतात. प्रत्येक वेळी निवडणूक उमेदवारी अर्ज भरण्यासाठी ते वेगवेगळ्या रुपात तिथे पोहचतात. निवडणुकीच्या प्रचारासाठी ते त्यांच्या सायकलचा वापर करतात. याशिवाय चहाच्या दुकानात येणाऱ्या ग्राहकांनाही ते चहासह हात जोडून विनंती करतात, की फक्त त्यांनाच मतदान करावं, मागील २७ वेळा यांनी असे निवडणुकीचे अर्ज भरले, पण अद्यापही त्यांना यश आलेलं नाही.
आनंद कुशवाह सांगतात की, त्यांच्याच समाजातील एका नेत्याने त्यांना राजकारणाबद्दल काहीतरी सांगितलं होतं. तेव्हापासून त्यांनी निवडणूक लढवायचीच असा निर्णय घेतला. ते म्हणतात, की आपण निवडणूक जिंकली नसली, तरी तो नेता मला जितकी मतं मिळाली, तितक्याच मतांच्या फरकाने हरला. त्यांचा असा विश्वास आहे की मी त्याचा पराभव केला. निवडणूक लढवण्याच्या त्यांच्या या वेगळ्याच शैलीमुळे ते अनेकदा लोकांच्या हसण्याचा विषय ठरतात, पण त्यांना याचा काहीही फरक पडत नसल्याचंही त्यांनी सांगितलं आहे.