| मुंबई | कोरोनाच्या विषाणूंचा फैलाव रोखण्यासाठी सोशल डिस्टन्सिंग पाळलं जावं असं वारंवार सांगितलं जात आहे. पण सोशल डिस्टन्सिंग ठेवताना सहा फुटांचं अंतर ठेवल्यानंतरही करोनाची लागण होण्याची भीती आहे. कारण खोकल्याने किंवा शिंकल्याने करोनाचे विषाणू जवळपास २० फुटांपर्यंत जाऊ शकतात असं एका संशोधनात समोर आलं आहे. संशोधकांना वेगेवगळ्या वातावरणात खोकणे, शिंकणे तसंच श्वास सोडताना निघणाऱ्या थेंबांचा अभ्यास केला असून एक मॉडेल तयार केलं आहे. यानुसार थंड आणि दमट हवामानात कोरोनाच्या विषाणूंचा फैलाव तीन पट वेगाने होऊ शकतो. प्रेस ट्रस्ट ऑफ इंडिया (PTI) याबाबत सविस्तर वृत्त दिलं आहे.
तैवानमधील नॅशनल सन यात-सेन युनिव्हर्सिटीचे चिया वँग आणि सॅन दियागोमधील कॅलिफोर्निया युनिव्हर्सिटीचे किंबर्ली प्रादर व डॉ. रॉबर्ट स्कूली या संशोधकांनी दिलेल्या माहितीनुसार, खोकताना किंवा शिंकताना निघणारे थेंब जवळ जवळ २० फुटांपर्यंत प्रवास करत कोरोनाचा फैलाव करु शकतात. यामुळे सध्या सोशल डिस्टन्सिंगमध्ये सहा फुटांचं अंतर ठेवलं जावं असं सांगणारा नियम कोरोनाला ऱोखण्यासाठी पुरेसा नसल्याचं आता समोर आलं आहे.
गेल्या काही अभ्यासांच्या आधारे संशोधकांनी दिलेल्या माहितीनुसार, खोकणे, शिंकणे इतकंच नाही तर सामान्यपणे बोलताना जवळपास ४० हजार थेंब बाहेर पडू शकतात. हे थेंब प्रती सेकंद काही मीटरपासून ते १०० मीटरपर्यंत प्रवास करु शकतात. जुन्या संशोधनांच्या आधारे संशोधकांनी सांगितलं आहे की, थेंबांची वायुगती, उष्णता आणि वातावरणासोबत होणाऱ्या बदलांमधील प्रक्रिया विषाणूंचा प्रभाव किती होईल हे ठरवतं.
संशोधनात सांगण्यात आलं आहे की, मोठे थेंब गुरुत्वाकर्षणमुळे एखाद्या गोष्टीवर साचून राहतात. पण छोटे थेंब एरोसोल कण तयार कऱण्यासाठी वेगाने बाष्पीभवन करतात. हे कण व्हायरसचा फैलाव करण्यात सक्षम असतात आणि अनेक तास हवेत राहतात.
मास्क घातल्याने विषाणूंची लागण होण्याचा धोका कमी होतो असंही संशोधकांनी सांगितलं आहे. सोशल डिस्टन्सिंगचं पालन करुन विषाणूंची लागण होण्याचा धोका टाळता येऊ शकतो असंही ते म्हणाले आहेत. मोठ्या थेंबांमधून विषाणूंचा प्रसार होण्याचं अंतर कमी असतं. हे विषाणू नष्ट होण्याआधी एखाद्या गोष्टीवर साचून राहतात. पण जर हे विषाणू एखाद्या व्यक्तीच्या शरीरावर साचले तर मात्र चेहऱ्याला हात लावण्याने, डोळे चोळल्याने विषाणू शरिरात जाऊ शकतात. पण सोशल डिस्टन्सिंग पाळत हे टाळलं जाऊ शकतं असं संशोधकांनी सांगितलं आहे. कोरोनाच्या पॅटर्नचा अभ्यास अद्यापही संशोधक करत असून त्याबद्दल ठोस असा निष्कर्ष अजून निघालेला नाही.
- लोकसभा निवडणुकीत मतदानात होतेय हेराफेरी ? जाणून घ्या व्हायरल व्हिडिओचं सत्य
- कंपनी असावी तर अशी… IT कंपनीने बाजारपेठेत उडवली खळबळ, लाभांशाची करणार लयलूट
- मुख्यमंत्री शिंदेंकडून ‘लाव रे तो व्हिडिओ’, उद्धव ठाकरेंची जुनी क्लिप दाखवत बोचरी टीका
- वसुली करणाऱ्यांना वसुली सोडून तसेही दुसरे काही सुचते असे नाहीच.
